Lebaply küştçüleriň gatnaşýan iň jogapkärçilikli ýaryşy başlandy
10-njy fewralda Aşgabat şäherinde küşt boýunça esasy milli ýaryşa ― Ýokary liganyň duşuşyklaryna badalga berildi. Ol erkekleriň we zenanlaryň arasynda geçirilýär.
Her toparda ýurdumyzyň iň güýçli 12 küştçüsi ýaryşýar. Şunda Birinji ligada goşa ýeňiş gazanan Ýagşygeldi Kakaýew adyndaky Halkara nebit we gaz uniwersitetiniň talyby Lala Şöhradowanyň erkek türgenleriň arasynda ýaryşmaga hukuk gazanan ýeke-täk zenan küştçi bolandygyny aýtmak gerek.
Ýaryş 18-nji fewralda tamamlanar. Ýokary liganyň ýeňijileri üstümizdäki ýylda geçiriljek halkara ýaryşlarda milli ýygyndymyzyň esasy wekilleri bolarlar.
