Lebapda ýazky bag ekişlik çärelerine badalga berildi

Lebap welaýatynda ýazky bag ekişlik dabarasy ýokary guramaçylykly geçirildi. Bu çärä ýaşuly nesliň wekilleri, dürli kärde zähmet çekýän ildeşler, talyp ýaşlar gatnaşdylar. Geçirilen bag ekmek işleriniň dowamynda gysga wagtyň içinde pürli agaç nahallarynyň 4 müň düýbi agrotehniki kadalara laýyklykda oturdyldy. Şol gün welaýat boýunça ähli etrapdyr şäherlerde hem bag ekişlik çärelerine giň gerim berildi.
Bag ekişlik çäreleriniň dowamynda jemi 11 müň düýp pürli, 7 müň 500 düýp saýaly agaçlar, şeýle hem 8 müň 400 düýp miweli, 3 müň 200 düýp üzüm nahallary we 14 müň 600 düýp tut agaçlary oturdyldy. Çäräniň geçirilýän ýerlerinde bag nahallarynyň, gülleriň we oba hojalyk gurallarynyň sergileri guralyp, medeniýet we sungat işgärleriniň çykyşlary hem ýaýbaňlandyryldy.