Lebapda ýazky at çapyşyklarynyň nobatdaky tapgyry geçirildi

Geçen ýekşenbe güni Lebap atçylyk sport toplumynda ýazky at çapyşyk möwsüminiň ikinji güni boldy. Bäş tapgyrdan ybarat bolan bäsleşiklerde ahalteke bedewleri dürli aralyklarda öz ukyplaryny görkezip, janköýerleriň gyzgyn el çarpyşmalaryna mynasyp boldular. 1200 metrden 2000 metre çenli dowam eden çekeleşikli ýaryşlarda Sanjar Bahtyýarow, Mustafa Töräýew, Daýanç Abdyrahimow we Durdymyrat Pirnazarow ýaly çapyksuwarlaryň dolandyrýan bedewleri pellehana ilkinji bolup gelmegi başardylar.
Bäsleşigiň barşynda welaýatyň dürli pudak edara-kärhanalaryna we hususy atşynaslara degişli bolan Gammar, Armangala, Aýnäzik, Garamanly we Bereketli atly bedewler durnukly netijeleri görkezdiler. Ýaryşlaryň ahyrynda ýeňiji bolan bedewlere däp bolan serpaýlar ýapylyp, seýislere we çapyksuwarlara gymmat bahaly sowgatlar dabaraly ýagdaýda gowşuryldy. Bu çäre sebitde atçylyk sportunyň ösdürilmegine we milli mirasymyzyň dabaralanmagyna goşant goşdy.