Lebapda ýaş aýdymçylaryň bäsleşigi geçirildi

Türkmenabat şäher medeniýet merkezinde welaýat medeniýet müdirligi hem-de welaýat baş bilim müdirligi bilen bilelikde «Sözi paýhas bezär, sazy — sungat» atly yglan edilen aýdym-saz bäsleşiginiň jemi jemlenildi. Bäsleşigiň bu tapgyryna welaýatymyzyň etrap-şäherlerinden ýaş zehinli aýdymçylaryň 18-si gatnaşdy.
Bäsleşige gatnaşan ýaş oglan-gyzlar milli aýdym-saz sungatynyň inçe ýollaryny dowam etdirmek, estrada aýdymlaryny we halk sazlaryny ýerine ýetirmek boýunça ukyp-başarnyklaryny görkezdiler. Çykyşlarda halkymyzyň milli medeniýeti, bagtyýarlyk döwrümiziň ösüş-özgertmeleri, şadyýan çagalyk öz beýanyny tapdy.
Netijede Dänew etrabyndaky ýöriteleşdirilen 18-nji orta mekdebiň okuwçysy Bahar Baýramowa birinji, Türkmenabat şäherindäki 22-nji orta mekdepden Ýakup Myradow ikinji orunlary eýelediler. Kerki etrabyndaky 20-nji orta mekdebiň okuwçysy Sungat Agajanow, Halaç etrabyndaky 8-nji orta mekdebiň okuwçysy Şöhrat Hamidow we Saýat etrabyndaky 3-nji orta mekdebiň okuwçysy Omar Bazarow dagy üçünji orna mynasyp boldular. Ýeňijilere we bäsleşige işjeň gatnaşan ýaşlara guramamyzyň welaýat geňeşi tarapyndan ýadygärlik sowgatlary hem-de Hormat hatlary gowşuryldy.