Lebapda möhüm biraýlyga bagyşlanan çäreler geçirilýär

Lebap welaýatynda öýkeniň howply täze döremelerine garşy göreşmegiň biraýlygynyň çäklerinde wagyz-nesihat çäreleri geçirilýär. Şolaryň biri Türkmenabat şäher medeniýet öýünde welaýat onkologiýa hassahanasy tarapyndan guraldy. Çärä jemgyýetçilik guramalarynyň, köpçülikleýin habar beriş serişdeleriniň wekilleri, saglygy goraýyş ulgamynyň işgärleri, dürli pudaklarda zähmet çekýän raýatlar hem-de ýaşlar gatnaşdylar.
Wagyz-nesihat çäresinde çykyş eden onkolog-lukmanlar öýkeniň howply täze döremeleriniň öňüni almakda keseli irki döwürde anyklamagyň, sagdyn durmuş ýörelgelerine eýermegiň, zyýanly endiklerden daş durmagyň möhüm ähmiýete eýedigini bellediler. Hünärmenler keseliň ilkinji alamatlary ýüze çykanda wagtyny geçirmän lukmana ýüz tutmagyň zerurdygyny düşündirdiler.
Çäräniň dowamynda gatnaşyjylar özlerini gyzyklandyran sowallar bilen hünärmenlere ýüz tutdular. Lukmanlar olara öýken saglygyny goramak, öňüni alyş barlaglaryndan geçmek we lukmançylyk maslahatlaryna eýermek boýunça giňişleýin düşündiriş berdiler.