Lebapda miwe we bakja önümleriniň bol hasyly ýygnaldy
Welaýat «Miwe» oba hojalyk senagat birleşiginde etraplar bilen baglaşylan
şertnama laýyklykda jemi 6 müň 45 gektar meýdana güýzlük ýeralma we gök-bakja ekinleri ekildi. Şonuň 900 gektary ýeralma, 900 gektary sogan, 450 gektary sarymsak, 475 gektary käşir, 3 müň 100 gektary mäş, 220 gektary bolsa noýbadyr. Hasyl möwsüminde ýeralmadan 12 müň 600, sogan, sarymsak, käşirden 34 müň 650, mäşdir noýbadan bolsa 4 müň 980 tonna hasyl almak maksat edinilýär. Mundan başga-da, hususy önüm öndürijiler bilen baglaşylan şertnamalar esasynda olaryň ýetişdiren azyklyk önümleri hem bökdençsiz kabul edilýär.
Senagat birleşiginiň gök-miwe önümlerini gaplaýjy bölüminde-de netijeli işler alnyp barylýar. Bu ýerde şu ýylyň başyndan bäri alma şiresidir mürepbesi, pomidor goýaltmasy ýaly önümleriň 2 müň 200 şertli gaby gaplanylyp, 8 million 260 müň manatlykdan gowrak iş edildi. Şeýle-de ýanwar — oktýabr aýlarynda taýýar önümleriň 7 million 456 müň manatlykdan gowragy ýerlenildi. Bu bolsa geçen ýylyň degişli döwründäki görkezijiden we bellenilen meýilnamadan ep-esli artykdyr.
