Lebapda Milli bahar baýramy bellenildi

Lebap welaýatynda Milli bahar baýramy — Halkara Nowruz güni mynasybetli dabaralar giň gerimde geçirildi. Esasy baýramçylyk çäresi Türkmenabat şäherindäki «Türkmeniň ak öýi» binasynyň öňündäki meýdançada guraldy. Dabara welaýat we şäher häkimlikleriniň, syýasy partiýalaryň hem-de jemgyýetçilik guramalarynyň wekilleri, ýaşulular, eneler, dürli ulgamlaryň işgärleri, talyp ýaşlar we köpsanly ýaşaýjylar gatnaşdy. Baýramçylyk meýdançasynda sungat ussatlarynyň ýerine ýetiren aýdym-sazlary, tans we folklor çykyşlary görkezildi.
Dabaranyň dowamynda amaly-haşam sungatynyň eserleriniň, el işleriniň hem-de oba hojalyk önümleriniň sergileri guraldy, milli tagamlar taýýarlanyp, myhmanlara hödür edildi. Şeýle hem ýaşlaryň arasynda milli oýunlar ýerine ýetirildi. Baýramçylyk çäreleri Köýtendagyň eteginde hem dowam etdirilip, aýdym-sazly çykyşlar geçirildi. Milli bahar baýramy mynasybetli dabaralar welaýatyň ähli etraplarynda we şäherlerinde ýokary ruhubelentlikde geçirildi.