Lebapda gowaça ekişine badalga berildi

Baharyň 25-nji gününde Lebap welaýatynda gowaça ekiş möwsümine girişildi. Esasy çäre Çärjew etrabynyň «Watan» daýhan birleşiginiň 6-njy kärendeçiler toparynyň 18 gektarlyk meýdanynda geçirildi. Çärä welaýat we etrap häkimleri, olaryň orunbasarlary, oba hojalyk boýunça hünärmenler, Türkmenistanyň Mejlisiniň deputatlary, edara-kärhanalaryň ýolbaşçylary, daýhan birleşikleriniň başlyklary, kärendeçiler we mehanizatorlar gatnaşdy.
Şu ýyl welaýat boýunça 130 müň gektar meýdanda gowaça ekilip, 320 müň tonna pagta öndürmek meýilleşdirilýär. Ekişde СЧХ–4БЭ, PES–4 görnüşli ekijiler hem-de «Monosem» görnüşli takyk ekijiler, «Claas AXION 850» we «John Deere 75M» kysymly traktorlar peýdalanylýar. «S-2606», «Ýolöten-39», «Ýolöten-7», «Ýolöten-53», «Garaşsyzlyk-30», «Buhara-8» we «Buhara-10» sortlary ekilýär. Welaýatdaky 11 pagta arassalaýjy kärhanada jemi 17 müň 64 tonna 284 kilogram gowaça tohumy taýýarlanyp, kärendeçilere ýetirildi.