Lebap welaýat saglygy dikeldiş okuw-terbiýeçilik toplumynyň binýadynda bilim işgärleriniň awgust maslahaty geçirildi. Maslahata welaýat baş bilim müdirliginiň hünärmenleri, mekdep müdirleri, welaýatyň etrap-şäherleriniň öňdebaryjy mugallymlary, terbiýeçiler gatnaşdylar.
Maslahatda orta mekdeplerde, çagalar baglarynda täze okuw ýylyna görlen taýýarlyk işleri, olaryň kitaplar, okuw-görkezme esbaplary, ösen tehnologiýaly enjamlar bilen üpjünçiligi, ýaş nesle döwrebap bilim, asylly terbiýe bermekde öňde durýan derwaýys wezipeler dogrusynda gürrüň edildi.
Çäräniň barşynda öňdebaryjy bilim işgärlerine welaýat baş bilim müdirligi tarapyndan Hormat hatlary, gymmat bahaly sowgatlar gowşuryldy. Maslahata gatnaşyjylar Türkmenabat şäherindäki ýöriteleşdirilen 3-nji orta mekdepde ýaýbaňlandyrylan okuw-görkezme esbaplarynyň, el işleriniň sergisi bilen tanyşdylar, özara tejribe alyşdylar.
