Lebap welaýatynyň iň eýjejik gyzy saýlanyldy

Seýitnazar Seýdi adyndaky döwlet sazly-drama teatrynda «Iň eýjejik gyzjagaz — 2025» atly şadyýan bäsleşigiň welaýat tapgyry geçirildi. Oňa bäsleşigiň etrap-şäher tapgyrlarynda ýeňiji bolan 2 — 4-nji synp okuwçylar gatnaşdylar.
Olar hormatly Prezidentimiziň we Gahryman Arkadagymyzyň parasatly baştutanlygynda ýurdumyzda alnyp barylýan tutumly işleri, bagtyýar çagalygy, dost-doganlygy, sporty wasp edýän aýdym-sazly çykyşlary ýerine ýetirdiler. Şeýle hem milligimize, sungatymyza, medeniýetimize bolan söýgüsini şahyrana sözleriň üsti bilen beýan etdiler. Gyzjagazlar özleriniň ýaş aýratynlyklaryna görä, ene-mamalarymyzdan miras galan milli el işlerimizi ýerine ýetirmek boýunça hem başarnyklaryny görkezdiler.
Bäsleşigiň netijeleri boýunça Saýat etrabyndaky 29-njy orta mekdebiň okuwçysy Aýgözel Muhammedowa birinji, Köýtendag etrabyndaky 4-nji orta mekdebiň okuwçysy Aknur Haýitmuradowa ikinji orunlara mynasyp boldular we bäsleşigiň döwlet tapgyryna gatnaşmaga hukuk gazandylar. Türkmenabat şäherindäki 11-nji orta mekdebiň okuwçysy Jennet Çopanowa üçünji orna mynasyp boldy. Ýeňijilere Türkmenistanyň Magtymguly adyndaky Ýaşlar guramasynyň welaýat geňeşi tarapyndan Hormat hatlary we ýadygärlik sowgatlary dabaraly ýagdaýda gowşuryldy.