Lebap welaýat häkimligi dört desgany satuwa goýdy

Bu barada Türkmenistanyň Maliýe we ykdysadyýet ministrliginiň 13-nji oktýabrda «Türkmenistan» gazetinde çap etdiren bildirişinde görkezilýär. Desgalaryň ählisi ministrligiň edara binasynda 17-nji oktýabrda geçiriljek bäsleşikli söwdada satlyga çykarylar.
Satuwa çykarylan desgalaryň ilkinjisi ― «Lebapdaşarysöwda» daşary ykdysady birleşiginiň Türkmenabat şäheriniň Garaşsyz Diýar we Merw köçeleriniň çatrygynda ýerleşýän iki gatly binasy 2016-njy ýylda guruldy. 5 müň 407 inedördül metr meýdany tutýan desganyň başlangyç bahasy 21,5 million manatdan geçýär.
«Lebapgurluşyk»önümçilik birleşiginiň 18-nji gurluşyk-gurnama müdirliginiň Dänew etrabynyň Berzeň geňeşliginiň Hendekli obasynda ýerleşýän bişen kerpiç öndürýän sehi 2017-nji ýyldan bäri işläp gelýär. Başlangyç bahasy 4,2 million manatdan geçýän desganyň tutýan meýdany 3 müň 967 inedördül metr.
Ýene şol gurluşyk-guranam müdirliginiň Saýat etrabynyň Suwçyoba şäherçesiniň golaýynda ýerleşýän dynç alyş öýi 1988-nji ýylda guruldy. 1 müň 677 inedördül metr meýdanda ýerleşýän binanyň başlangyç bahasy 3 million manada golaýlaýar.
Bildirişde şol gurluşyk-gurnama müdirliginiň Hojambaz etrabynyň Hojambaz şäheriniň S.A.Nyýazow adyndaky köçesiniň ugrunda ýerleşýän kerpiç örýän sehiniň hem satylýandygy aýdylýar. 1969-njy ýylda gurlan seh 1 müň 893 inedördül metr meýdany eýeleýär. Onuňbaşlangyç bahasy 2,2 million manatdan geçýär.