Kitaphanalarda diňe bir kitaplar jemlenip saklanman ol biziň medeni mirasymyzy, taryhymyzy, edem-gylymlarymyzydyr, ähli baýlyklarymyzy saklaýar. Jemgyýetiň bilim derejesi ýokarlansa, ösüp gelýän şahsyýetler kämilleşse ýurdumyzyň ähli taraplaýyn ösmegine özüniň oňyn täsirini ýetirer.
Dünýäde sanly ulgama geçirilmegi bilen elektron kitaphanalar internet dükanlarynda hyzmat edýär. Ýöne elektron kitaphanalardan peýdalanmak adamlara elýeter bolmagyna seretmezden kitap okyjylaryň aglaba bölegi hakyky kitaplary okamagy saýlaýarlar.
Ýurdumyzda, Ata Watanymyzda ýaşlara, olaryň okap bilim almagyna döwrebap şertler döredilen. Welaýat merkezlerinde täze döwrebap enjamlar ornaşdyrylan Merkezi kitaphanalar döredilip ulanylmaga berildi. Kitaphanalarda jemlenen dürli kitaplardan ilatyň islendik wagtda elýeterli peýdalanyp bilmegi kitap söýüjileri ýene-de begendirdi. Ýurdumyzda kitaphana işiniň sanly ulgama geçirilmegi ugrunda hem birnäçe işler alnyp barylýar. Döredilýän milli elektron kitaphanalar özleriniň hyzmatlaryny gün – günden giňeldýärler. Kitaphanalaryň kitap gaznalarynyň döwrebap eserler bilen baýlaşdyrylmagy, kitaphana işgärleriniň hünär derejelerini ýokarlandyrmak üçin yzygiderli okuwlaryň gurnalmagy bolsa bu ugurda alnyp barylýan işleriň aýdyň mysalydyr.
Maral ŞANAZAROWA,
Darganata etrabyndaky
6-njy orta mekdebiň kitaphanaçysy.
