Kerkiniň medeniýet işgärleri baýramçylygy sowgatly garşyladylar
Kerki etrabynyň medeniýet bölüminiň işgärleri hem Garaşsyzlygyň 33 ýyllyk baýramyny zähmet üstünlikleri bilen garşyladylar.
Etrabyň medeniýet bölüminiň halk teatrynyň işgärleri akyldar şahyryň ömri we döredijiligi bilen baglanyşykly sahna eserleriniň birnäçesini tomaşaçylar köpçüligine ýetirdiler. Sahna ussatlary özleriniň çykyşlary bilen ýurtda geçirilýän medeni çärelere, döredijilik bäsleşiklerine hem işjeň gatnaşýarlar. Döredijilik topary üstümizdäki ýylda welaýatyň folklor toparlarynyň arasynda geçirilen bäsleşikde “Bäsleşik toýy” atly oýny bilen baş baýraga mynasyp boldy.
Teatryň döredijilik topary Türkmenistanyň halk ýazyjysy Nobatguly Rejebowyň “Magtymguly Pyragy” atly romany esasynda sahnalaşdyran spektakly bilen ýurduň halk teatrlarynyň arasynda yglan edilen bäsleşigiň welaýat tapgyrynda ikinji orna mynasyp boldy.
Etrabyň aýdymçy-sazandalar hem täze joşgunly aýdym-sazlary bilen baýramçylygy sowgatly garşyladylar.
Halkyň däp-dessurlaryny, edim-gylymlaryny we asylly ýörelgelerini wagyz etmekde etrabyň döredijilik işgärleriniň ählisi-de yhlasyny, gaýratyny gaýgyrmaýarlar.
