Kerkili gyz Gaýnarbaba şypahanasy baradaky taslamasyny hödürledi

Kerki etrabyndaky 35-nji orta mekdebiň 12-nji synp okuwçysy Laçyn Haitowa «Altyn asyryň altyn zehinleri» bäsleşiginiň döwlet tapgyrynda «Köýtendagy dünýäniň syýahatçylyk merkezine öwürmek we Gaýnarbaba şypahanasy» atly ylmy-taslama işini hödürläp, ikinji orna mynasyp boldy. Taryh mugallymy Gülnara Atajanowanyň ýolbaşçylygynda taýýarlanylan bu taslamada Gaýnarbaba kölüniň suwunyň tebigy bejerijilik ähmiýeti ylmy esasda öwrenilip, şol künjekde döwrebap şypahana ulgamyny döretmek baradaky teklipler öňe sürüldi.
Ylmy işiň çäginde Köýtendagyň dag gowaklaryndaky gadymy suratlar öwrenilip, bu sebitiň adamzat medeniýetiniň iň irki ojaklarynyň biridigi baradaky maglumatlar ulgamlaşdyryldy. Magtymguly adyndaky Türkmen döwlet uniwersitetiniň uly mugallymy, taryh ylymlarynyň kandidaty I. Annaorazow tarapyndan oňyn syn berlen bu taslama, sebitiň syýahatçylyk mümkinçiliklerini ýokarlandyrmaga gönükdirilen anyk ylmy garaýyşlary öz içine alýar.