Kazyýet işgärleriniň arasynda bäsleşik geçirildi
Lebap welaýat kazyýeti tarapyndan hünär bäsleşikleriniň ikisi: «Iň göreldeli kazynyň kömekçisi» we «Iň göreldeli kazyýet ýerine ýetirijisi» atly bäsleşikler geçirildi. Oňa welaýat, etrap, şäher kazyýetleriniň işgärleri gatnaşdylar.
Kazylaryň kömekçileriniň arasynda geçirilen hünär bäsleşiginde Halaç etrap kazyýetiniň kazysynyň kömekçisi Gülşirin Ýazhanowa ähli bäsdeşlerinden tapawutlanyp, birinji ornuň eýesi boldy. Ikinji orny Dänew etrap kazyýetiniň kazysynyň kömekçisi Leýla Umarowa, üçünji orny bolsa Türkmenabat şäher kazyýetiniň kazysynyň kömekçisi Göwher Kulyýewa eýeledi.
Türkmenabat şäher kazyýetiniň kazyýet ýerine ýetirijisi Merdan Japparow kazyýet ýerine ýetirijileriniň arasynda geçirilen hünär bäsleşiginiň ýeňijisi boldy. Eminler ikinji orna ýene-de welaýat merkezinden Zaur Astanowy, üçünji orna bolsa Çärjew etrap kazyýetiniň kazyýet ýerine ýetirijisi Şöhrat Jumaýewi mynasyp gördüler.
