Kärdeşler arkalaşygy Türkmenabatda çeper okaýyş bäsleşigini geçirdi
Magtymguly Pyragynyň doglan gününiň 300 ýyllygy mynasybetli welaýat maliýe-ykdysady orta hünär okuw mekdebinde çeper okaýyş bäsleşigi geçirildi.
«Magtymguly, sözlär tili türkmeniň» diýen at bilen geçirilen bu bäsleşige Türkmenabat şäherindäki ýörite orta hünär okuw mekdepleriniň talyplary gatnaşdylar.
Bäsleşigiň netijeleri boýunça welaýat maliýe-ykdysady orta hünär okuw mekdebiniň talyby Maksat Myradow baş baýraga mynasyp boldy. Welaýat ýörite sungat mekdebiniň talyby Ata Gaýypow birinji, ýene-de şol mekdebiň talyby Gözel Eşgeldiýewa we Türkmenabat şäherindäki tehniki orta hünär okuw mekdebiniň talyby Gadam Eýeberdiýew ikinji baýrakly orny eýelediler. Türkmenabadyň lukmançylyk orta okuw mekdebinden Kemal Akmamedow we Türkmenabat şäherindäki derýaçylyk orta hünär okuw mekdebinden Laçyn Öwezmyradowa bäsleşigiň üçünji baýrakly ornuna mynasyp boldular.
Ýeňijiler Türkmenistanyň Kärdeşler arkalaşyklarynyň Lebap welaýat birleşmesi tarapyndan ýadygärlik sowgatlary bilen sylaglanyldy.
