Häzirki döwürde döwletimiziň ösüş ýolunda kanunylygyň pugtalandyrylmagy, adalatlylygyň üpjün edilmegi aýratyn ähmiýete eýedir. Türkmenistanyň Konstitusiýasy hem-de kabul edilýän beýleki hukuk namalary jemgyýetimiziň ähli ugurlarynda tertip-düzgüniň berjaý edilmegini üpjün edýär. Kanunyň hökmürowanlygy döwletimiziň syýasy, ykdysady we jemgyýetçilik durmuşynyň möhüm binýady bolup, her bir raýatyň hukuklarynyň we azatlyklarynyň goragly bolmagyny kepillendirýär.
Hormatly Prezidentimiziň baştutanlygynda ýurdumyzda hukuk döwletini ösdürmäge gönükdirilen giň gerimli işler alnyp barylýar. Bu ugurda kazyýet ulgamynyň işini kämilleşdirmek, kanunlaryň talabyny takyk ýerine ýetirmek hem-de raýatlaryň kanuny bähbitleriniň ygtybarly goralmagyny üpjün etmek möhüm wezipeleriň hatarynda durýar. Kazyýet işgärleri hökmünde biz hem öz işimizde kanunyň talaplaryna berk eýerip, adalatly karar çykarmagy, jemgyýetde ynamyň we kanunylygyň pugtalandyrylmagyna goşant goşmagy baş maksatlaryň biri hasaplaýarys.
Kanuny döwlet diňe bir kanunlaryň kabul edilmegi bilen çäklenmän, olaryň durmuşda doly ýerine ýetirilmegi bilen berkidilýär. Şonuň üçin hem raýatlaryň hukuk sowatlylygyny ýokarlandyrmak, ýaş nesli kanuna hormat goýmak ruhunda terbiýelemek aýratyn möhümdir. Çünki jemgyýetiň her bir agzasy kanunyň talaplaryny berjaý etse, jemgyýetde tertip-düzgün pugtalanyp, ösüşiň täze mümkinçilikleri açylýar.
Şeýlelikde, kanunyň hökmürowanlygy berkarar bolan döwletde parahatçylyk, durnuklylyk we ösüş üpjün edilýär. Kanuny döwlet — raýatlaryň bagtyýar durmuşynyň ygtybarly kepilidir. Şeýle bagtyýar döwürde ýaşamak, zähmet çekmek we ýurdumyzyň ösüşine goşant goşmak bolsa her birimiziň buýsanjymyzdyr.
Bahtiýar ALYMOW,
Döwletli etrap kazyýetiniň kazysy.
