Hasabat konsert geçirildi
Saz bilen söhbede ýaman diýmäňler,
Adam, Howa dünýä inende bardyr.
Aýdym – saz sungatynyň ynsan kalbyna edýän täsiri hakynda pederlerimiz ir wagtlar düşünipdirler. Göwnüçökgün wagtyň ruhuňy göterýän aýdym – saz sungatynyň artykmaç taraplary hakyndaky pelsepä düşünýän ata -babalarymyz perzentleriniň hal – ýagdaýyna, saglygyna hem uly täsir etjekdigine ynanypdyrlar. Türkmen milletiniň gadymýetden saz sungatyna bolan hormaty we söýgüsi biziň günlerimizde hem has güýjäp, halkymyzyň kalbynda baky ornaşdy. Hormatly Prezidentimiziň tagallasy bilen zehinli çagalaryň arasynda ýylyň – ýylyna geçirilýän dürli döredijilik bäsleşikler, baýramçylyk çäreleri hem munuň aýdyň subutnamasydyr.
Ýakynda Lebap welaýat çagalar sungat mekdebiniň “Kirişli saz gurallar” bölüminiň 2023 – 2024 – nji okuw ýyly boýunça hasabat konserti uly şowhun we şatlyk bilen geçdi. Dabara A.Wiwaldiniň G – dur Konsertiniň 1 – nji bölümi bilen açyldy. Ony mugallym S.Jabbarowanyň 2-nji synp okuwçysy Klara Ýusupowa ýerine ýetirdi. Soňra mugallym G.Çaryýewanyň 2 – nji synp okuwçysy Aýnur Aýhanowanyň ýerine ýetirmeginde kompozitor N.Halmämedowyň “Türkmen tansy” atly ajaýyp eseri şeýle – de mugallym F.Muradowyň 2 – nji synp okuwçysy Daýanç Raýhanowyň ýerine ýetirmeginde W.Muhadowyň “Çal dutar ” eseri ýaňlandy. 2-nji synp okuwçysy Milara Tahirjanowa , mugallymy Ý. Arslanowa, kompozitor Ç.Nurymowyň eserini ýerine ýetirdi. Mugallymlar L.Jumaýewanyň we S.Sardarýanyň okuwçylary Asal Aýlyýewanyň hem Nurana Ýangibaýewanyň ezberlik bilen ýerine ýetirmeginde R.Telepnýowyň “Gezelenç” atly eseri ýaňlandy. Dünýä belli K.Sen – Sansyň “Guw” atly eseri mugallym Z.Jumaýewiň 7-nji synp okuwçysy Leýli Tirkeşowanyň şeýle – de E.Jenkinsonyň “Tans” eseri mugallym L.Jumaýewanyň okuwçysy Asal Aýlyýewanyň ýerine ýetirmeginde ýaňlandy. Mugallym N.Jumanazarowanyň okuwçysy Aýperi Genjimowa N.Halmämmedowyň “Nar agajy” eserini, mugallym S.Sardarýanyň okuwçysy Aýjahan Durdyýewa “Nowaýy” atly türkmen halk sazyny ezberlik bilen ýerine ýetirdiler. Mugallym A.Kerimowanyň synpynyň ýerine ýetirmeginde Ç.Nurymowyň “Meleguş” we E.Belousyň Sazlar çemeni ýaly eserler ýaňlandy. A.Şapoşnikowyň Poema eserini mugallym Z.Ýusupowanyň 7 – nji synp okuwçysy Sewara Polatowa , W.Mosartyň “Nemes tansy” atly eserini mugallym G.Azimowanyň 7 – nji synp okuwçysy Leýli Rejepalyýewa ýerine ýetirdiler. Mugallym L.Jumaýewanyň 7 – nji synp okuwçysy Ereşgül Atamyradowa Ç.Nurymowyň Sonatasynyň III bölümini şeýle – de mugallym L.Waliýewanyň 7-nji synp okuwçysy Firuza Rowşanowa I.Tribosyň “Iki türkmen halk heňi” atly eserlerini ýerine ýetirdiler. Mugallym S.Sardarýanyň üstünikli ýolbaşçylygynda, “Türkmeniň altyn asyry” bäsleşiginiň ýeňijisi, mekdebiň “Bagtyýarlyk” skripkaçylar topary N.Halmämmedowyň “Şükür bagşy” kinofilminden sazyny, M.Musorgskiniň “Gopak” şeýle – de M.Annamyradowyň “Türkmen tansy” ýaly çylşyrymly we ajaýyp eserleri ýerine ýetirmegi bu saz agşamynyň dabaraly jemlenmesi boldy. Mekdepde zähmet çekýän zehinli mugallymlar L.Kerimowanyň , M,Gorbunowanyň , L.Toýliýewanyň we D.Seýitkulyýewanyň sazandarlyk etmegi bolsa ýaş uçgunlara ruhubelentlik bilen ýerine ýetirmeklige uly ýardam berdi. Konsertiň soňunda ene – atalar tarapyndan ençeme hoşallyk sözler aýdylyp, mugallymlara çeken zähmeti üçin minnetdarlyk bildirildi. Ýaş zehinleriň geljekde türkmen professional saz sungatyny ösdürmekde öz goşandyny goşjak sazandalar we mugallymlar bolup ýetişmegini arzuwlaýarys.
Lebap welaýat çagalar sungat mekdebiniň “Kirişli saz gurallar” bölüminiň bölüm müdiri,
mugallym Suraý Sardarýan
