Halaçly mugallym Lebabyň iň gowy mugallymy hökmünde ykrar edildi

Halaç etrabynyň 4-nji orta mekdebiniň iňlis dili mugallymy Annagözel Jumageldiýewa «Ýylyň mugallymy ― 2026» bäsleşiginiň welaýat tapgyrynda birinji orny eýeläp, Lebap welaýatynyň iň gowy mugallymy hökmünde ykrar edildi. Türkmenabat şäherindäki ýöriteleşdirilen 41-nji orta mekdepde geçirilen bäsleşige deslapky tapgyrlarda ýeňiji bolan mugallymlar gatnaşyp, olaryň usulyýet we ylmy işleri, hünär ussatlygy hem-de ukyp-başarnyklary seljerildi.
Netijede, Türkmenabat şäherindäki ýöriteleşdirilen 39-njy orta mekdebiň biologiýa mugallymy Aman Berdimyradow bilen Çärjew etrabyndaky 12-nji orta mekdebiň geografiýa mugallymy Enejan Ereşowa ikinji orna mynasyp boldular. Şeýle-de Saýat etrabyndaky ýöriteleşdirilen 4-nji orta mekdebiň matematika mugallymy Aýsoltan Amanmedowa, Darganata etrabyndaky 1-nji orta mekdebiň iňlis dili mugallymy Dilşat Ýaraşowa hem-de Dänew etrabyndaky ýöriteleşdirilen 19-njy orta mekdebiň rus dili mugallymy Tatýana Ýewdokimowa üçünji orny eýelediler. Bäsleşigiň ýeňijilerine welaýat baş bilim müdirliginiň Hormat hatlary we Türkmenistanyň Kärdeşler arkalaşyklarynyň welaýat birleşmesiniň ýadygärlik sowgatlary gowşuryldy.