Guşakly göreş boýunça Türkmenabadyň birinjiligi geçirildi
Welaýat merkezindäki 7-nji sport mekdebinde guşakly göreş boýunça Türkmenabat
şäheriniň birinjiligini almak ugrunda ýaryş guradyk. Oňa welaýatyň etrap-şäherlerinden
2007-nji ýylda doglan we şondan kiçi ýaşly türgenleriň köpsanlysy gatnaşdy.
Agram derejeleriniň 11-si boýunça guralan tutluşyklar ýaş pälwanlaryň ussatlyklaryny
artdyrmaga ýene bir mümkinçilik boldy. Ýaryşyň tutuş dowamynda saýatly we
türkmenabatly türgenler has üstünlikli çykyş edip, baýrakly orunlaryň aglabasyny eýelediler.
Olary ýaryşa guşakly göreş boýunça welaýatyň baş tälimçisi Toýly Gylyjow, tälimçiler
Agamyrat Mätdurdyýew, Azat Aşyrow taýýarladylar. Eminler ýaş pälwanlar Esger Gylyjowyň,
Orazmämmet Orazmämedowyň, Ereş Akmyradowyň, Kakajan Aşyrowyň ugurtapyjylygyna
ýokary baha berdiler.
Pälwanlara Türkmenistanyň Agrar partiýasynyň Türkmenabat şäher komiteti tarapyndan
ýadygärlik sowgatlary gowşurdyk.
