Garabekewülli gurnak ýolbaşçysy Lebabyň iň hünärli zenan maşgalasy diýlip ykrar edildi

Garabekewül etrabyndaky çagalar we ýetginjekler döredijilik öýüniň gurnak ýolbaşçysy Şirin Salyhowa Lebap welaýatynda 2026-njy ýylyň eli iň hünärli zenany diýlip yglan edildi. Türkmenistanyň Zenanlar birleşiginiň Merkezi Geňeşiniň we Kärdeşler arkalaşyklarynyň Milli merkeziniň bilelikde guramaklarynda eli çeper zenanlaryň arasynda yglan edilen «Hünärim bar ― hormatym bar» atly bäsleşigiň Türkmenabat şäherindäki «Bagt köşgi» toý-dabaralar merkezinde geçirildi.
Gatnaşyjylar sanlyja minutlarda çaga köýnegini biçip-tikmek, özleriniň sünnäläp bejeren el işlerini şahyrana wasp etmek, döwrebap nagyşlar bilen keşdelenilen milli lybaslaryň sergisini guramak bilen ukyp-başarnyklaryny açyp görkezdiler. Welaýatyň sungat ussatlarynyň ýerine ýetiren şowhunly aýdymlary bu günki dabarany uly ruhubelentlige besledi.
Bäsleşikde Farap etrabyndaky 20-nji orta mekdebiň mugallymy Jeren Hojakulyýewa ikinji, Dänew etrabyndaky 32-nji orta mekdebiň mugallymy Ogulsoltan Ýaraşowa bolsa üçünji orunlara mynasyp boldular. Ýeňijiler bäsleşigiň döwlet tapgyryna gatnaşmaga hukuk gazandylar.