Gandbol boýunça welaýatyň çempionaty geçirildi
Sportuň gandbol görnüşi boýunça welaýatyň çempionaty geçirildi. Oňa Türkmenabat şäheriniň, Dänew we Çärjew etraplarynyň toparlary gatnaşdylar.
Ýaryşda welaýat merkezi bilen Dänew etrabynyň her haýsyna iki toparyň wekilçilik edendigini nygtamak gerek. Ýeri gelende aýtsak, her bir topar 14 türgenden ybarat boldy. Gyzykly duşuşyklaryň netijesinde Türkmenabat şäherine wekilçilik eden birinji topara ýaryşda taý tapylmady. Ikinji orny bolsa Dänew etrabynyň birinji topary eýeledi. Öňdebaryjylaryň üçlügini welaýat merkeziniň ikinji topary jemledi.
Tejribe toplamakda uly ähmiýete eýe bolan ýaryşyň ahyrynda onuň ýeňijilerine we ähli gatnaşyjylara Türkmenistanyň Magtymguly adyndaky Ýaşlar guramasynyň Türkmenabat şäher geňeşi tarapyndan ýadygärlik sowgatlary we Hormat hatlary gowşuryldy.
