“Galkynyş” milli at üstündäki oýunlar topary
Galkynyş milli at üstündäki oýunlar topary döredilenden şu günki güne çenli eýýäm 6-njy gezek halkara festiwallarda ýeňiş gazanyp gelýär. Sirk sungatynyň janköýerlerini haýrana goýýan at üstündäki milli oýunlary bu topary dünýä meşhur etdi. “Galkynyş” milli at üstündäki oýunlar toparynyň ýerine ýetirýän çykyşlary, olaryň kämillige tarap barýan ýollary öz topragymyzdan başlan dünýäniň ol künjüne baryp ýetdi diýsek ýalňyşmarys.
Russiýa Federasiýasynyň Tatarystan Respublikasynda indi ýyllardyr geçirilýän “Saban tuý” dabarysynda ilkinji gezek çykyş eden ildeşlerimiz şonda şowly çykyş edip baş baýragy gazanypdylar. Şol günden bäri “Galkynyş” milli at üstündäki oýunlar topary Belarus Respublikasynda, Türkiýede, Täjigistanda,
Bähreýn Patyşalygynda özleriniň gyzykly çykyşlarydyr oýunlary bilen halk köpçüligini haýrana goýmagy başaryp gelýär.
Gahryman Arkadagymyzyň kämillik mekdebinden sapak alyp taplanan bu topar 2013-nji ýylda Moskwada geçirilen “IDOL” Bütindünýä sirk sungatynyň festiwalynda, 2014-nji ýylda Italýanyň Latina şäherinde geçirilen “Sitta di-Latina” atly halkara festiwalynda, 2016-njy ýylda Gyrgyz respublikasynyň Çolpon-Ata şäherinde geçirilen çarwadarlaryň bütindünýä oýunlarynda, 2018-nji ýylda Sankt-
Peterburg şäherinde geçirilen sirk sungatynyň festiwallaryna baýrakly orunlara mynasyp boldular. Şu günki güne çenli bolsa dünýäniň 5 gezek çempiony bolmagy başaran bu toparyň görkezýän oýunlary Ginnesiň rekordlar kitabyna girmäge mynasyp.
KLYÇEW Dawud,
S.A.Nyýazow adyndaky TOHU-nyň Türkmenabat agrosenagat orta
hünär okuw mekdebiniň talyby.
