Farapda we Halaçda kazyýet edaralarynyň täze binalary gurlar

Lebap welaýatynyň Farap we Halaç etraplarynda etrap kazyýetleriniň täze dolandyryş binalarynyň gurluşygyny amala aşyrmak meýilleşdirilýär. Türkmenistanyň Gurluşyk we binagärlik ministrligi ýurduň bäş etrabynda etrap kazyýetleriniň dolandyryş binalaryny gurmak boýunça bäsleşik yglan etdi.
Tender resminamalaryna laýyklykda, täze binalar Türkmenistanyň Ýokary kazyýetiniň sargyt etmegi boýunça gurlar. Gurluşyk işleri Daşoguz welaýatynyň Akdepe we Görogly, Lebap welaýatynyň Farap we Halaç, şeýle hem Mary welaýatynyň Sakarçäge etraplarynda amala aşyrylar.
Bäsleşige gatnaşmak isleýän taraplaryň arzalary we teklipleri 2026-njy ýylyň 2-nji iýulyna çenli Türkmenistanyň Gurluşyk we binagärlik ministrliginiň Bazary öwreniş we daşary ykdysady gatnaşyklar müdirliginde kabul edilýär. Salgysy: Aşgabat şäheri, Arçabil şaýoly, 84. Habarlaşmak üçin telefon belgileri: 44-46-77, 44-46-64.
Bäsleşik baradaky bildiriş «Türkmenistan» gazetiniň 2026-njy ýylyň 16-njy maýyndaky sanynda çap edildi. Täze kazyýet binalarynyň gurulmagy sebitlerde hukuk edaralarynyň maddy-enjamlaýyn binýadyny berkitmäge, raýatlara edilýän hyzmatlaryň hilini ýokarlandyrmaga ýardam eder.