Farapda şahyr Ýagmyr Pirgulyýewiň döredijiligine bagyşlanan kitap sergisi guraldy
Çärjew etrabynyň Farap şäher kitaphanasynda şahyr Ýagmyr Pirgulyýewiň döreden çagalar edebiýatyna bagyşlanan kitap sergisi guraldy. «Bökjekleýär, oýnaýar, gök otjagaz çeýneýär» atly sergide şahyryň dürli ýyllarda çap edilen kitaplary, onuň döredijiligi barada gürrüň berýän materiallar, suratlar goýuldy.
Tomus dynç alşynda ýören mekdep okuwçylary serginiň ilkinji myhmanlary boldular. Olara şahryň ömri we döredijiligi barada gürrüň berdiler. Soňra şahyryň goşgularyny labyzly okadylar.
Ýagmyr Pirgulyýew çagalar edebiýatyna saldamly goşant goşan we yz galdyran şahyrdyr. Ol 1929-njy ýylda dünýä inip, 2000-nji ýylda aradan çykdy. Onuň «Durnaly ada» (1965 ý.), «Jamlybiliň derekleri» (1967 ý.), «Çagalyk gahrymanym» (1971 ý.), «Keýigokara» (1975 ý.), «Sekiz sowal» (1976 ý.), «Säher sowgady» (1979 ý.), «Älemgoşar» (1982 ý.) kitaplary uly meşhurlyga eýedir. Onuň kitaplary rus, ukrain, belarus, moldowan, özbek, garagalpak, eston, gyrgyz dillerine terjime edildi.
