Farap etrabynda 40 adam halk maslahatynyň agzalygyna dalaşgär görkezildi

Farap etraby boýunça Halk maslahatynyň agzalygyna dalaşgärleri görkezmek işi geçirilip, etrap boýunça döredilen 20 saýlaw okrugynyň hersinde iki adamdan — jemi 40 dalaşgär hödürlenildi. Dalaşgärleriň arasynda dürli pudaklarda zähmet çekýän hünärmenler bar.
Dalaşgärleriň hünär düzümi boýunça mugallymlar köpçiligi emele getirýär. Berlen maglumatlara görä, 40 dalaşgäriň 21-si orta mekdeplerde işleýän mugallymlar bolup durýar. Şeýle hem olaryň arasynda 3 çagalar bagynyň terbiýeçisi, 1 sport mekdebiniň müdiri, 1 çagalar bagynyň müdiri, 1 orta mekdebiň müdiri we 2 mekdep müdiriniň orunbasary bar. Şeýle-de 2 geňeşligiň hünärmeni, 1 ýer serişdeleri bölüminiň hünärmeni, 1 salgyt gullugynyň hünärmeni, 1 statistika bölüminiň baş hünärmeni, 1 etrap häkimliginiň baş hünärmeni, 1 etrap häkimliginiň bölüm müdiri, 1 daýhan birleşiginiň kärendeçisi, 1 pagta arassalaýjy kärhananyň agronomy, 1 mekdebiň hojalyk müdiri hem-de 1 etrap medeniýet bölüminiň başlygy dalaşgärleriň hatarynda görkezildi.
Dalaşgärleriň arasynda zenanlaryň hem işjeň gatnaşýandygy bellenmäge mynasypdyr. Jemi 40 dalaşgäriň 17-si zenan, 23-si bolsa erkek bolup durýar. Zenan dalaşgärleriň arasynda esasan bilim ulgamynda zähmet çekýän mugallymlar we çagalar bagynyň terbiýeçileri agdyklyk edýär.
Saýlaw okruglarynyň ählisinde görkezilen dalaşgärleriň hemmesi Farap etrabynyň ýaşaýjylary bolup, olar dürli ýyllarda etrabyň geňeşliklerinde, şäherlerinde ýa-da şäherçelerinde dünýä inen zähmetsöýer raýatlar hökmünde tanalýar. Dalaşgärleriň hatarynda bilim, oba hojalygy, döwlet dolandyryşy, medeniýet, sport we beýleki jemgyýetçilik ähmiýetli ulgamlarda işleýän işgärleriň bolmagy olaryň jemgyýetçilik durmuşyna işjeň gatnaşýandygyny görkezýär.
Farap etraby boýunça görkezilen dalaşgärleriň arasynda ýaş hünärmenler hem, köp ýyllyk iş tejribesi bolan işgärler hem bar. Bu bolsa ýerli jemgyýetçilik işlerinde dürli nesilleri we hünär ugurlaryny birleşdirýän dalaşgärleriň gatnaşýandygyny görkezýär.