Hormatly Prezidentimiziň baştutanlygynda daýhanlara ýeňillikli karzlaryň, ýokary hilli tohumlaryň, döwrebap tehnikalaryň berilmegi olaryň öndürijiligini artdyrmakda möhüm ähmiýete eýe bolýar. Bu çäreler etrabymyzyň ykdysady kuwwatynyň berkemegine, bazarlarda azyk bolçulygynyň üpjün edilmegine hyzmat edýär.
Etrabymyzyň toprak-howa şertlerine laýyklykda ösdürilýän bugdaý we gowaça ekinleri bilen bir hatarda, gök-bakja we miweçilik ugurlarynda hem ýokary netijeler gazanylýar. Suwaryş ulgamlarynyň döwrebaplaşdyrylmagy, ýerleriň melioratiw ýagdaýynyň gowulandyrylmagy, agrotehniki çäreleriň öz wagtynda ýerine ýetirilmegi hasylyň artmagyna mümkinçilik berýär. Partiýa komitetimiziň işgärleri ýerlerde duşuşyklary geçirip, öňdebaryjy tejribeleri wagyz etmek, daýhanlara ylmy maslahatlary ýetirmek boýunça işjeň gatnaşýarlar.
Biz agrar syýasatyň üstünlikli durmuşa geçirilmegine jemgyýetçilik goldawyny güýçlendirmek, oba hojalygynyň geljegine ynamy berkitmek ugrunda alyp barýan işlerimizi mundan beýläk-de dowam etdireris. Halkymyzyň bolelin durmuşyna, Watanymyzyň durnukly ösüşine hyzmat etmek biziň esasy borjumyzdyr.
Gülnur ABDYÝEWA,
Türkmenistanyň Agrar partiýasynyň Çärjew etrap komitetiniň başlygy.
