Hormatly Prezidentimiziň parasatly baştutanlygynda Garaşsyz, hemişelik Bitarap Türkmenistan döwletimizde milli bilim ulgamyny ösdürmäge, ýaş nesli döwrebap bilimli hem-de ýokary ahlakly şahsyýetler edip terbiýelemäge aýratyn ähmiýet berilýär. Bilim ojaklarynda döredilýän giň mümkinçilikler, täze okuw maksatnamalary, döwrebap mekdepler hem-de sanly ulgamyň mümkinçiliklerinden netijeli peýdalanylmagy ýaşlaryň ylymly-bilimli bolup ýetişmegine berk binýat bolýar.
Bu beýik işlerde türkmen dili we edebiýaty mugallymlarynyň hem mynasyp paýy bardyr. Sebäbi ene dilimizi kämil öwretmek, ata-babalarymyzdan miras galan baý edebi gymmatlyklary ýaş nesliň kalbyna siňdirmek, olarda watançylyk, adamkärçilik, halallyk ýaly belent häsiýetleri terbiýelemek biziň mukaddes borjumyzdyr. Türkmen dili halkymyzyň ruhy hazynasydyr, edebiýat bolsa şol hazynanyň egsilmez çeşmesidir.
Sapaklaryň dowamynda Magtymguly Pyragynyň, Mollanepesiň, Seýitnazar Seýdiniň, Döwletmämmet Azadynyň hem-de beýleki söz ussatlarynyň eserlerini öwretmek arkaly okuwçylaryň dünýägaraýşyny giňeldýäris. Olaryň eserlerinde beýan edilýän agzybirlik, zähmetsöýerlik, ynsanperwerlik, Watan söýgüsi ýaly gymmatlyklar häzirki döwrümizde hem öz ähmiýetini ýitiren däldir. Şol sebäpli klassyky mirasymyz ýaş nesil üçin terbiýe mekdebi bolup hyzmat edýär.
Häzirki döwürde türkmen diliniň arassalygyny goramak, onuň gözelligini nesilden-nesle geçirmek hem möhüm wezipeleriň biridir. Okuwçylaryň söz baýlygyny artdyrmak, ýazuw we sözleýiş medeniýetini kämilleşdirmek, kitap okamaga höwes döretmek ugrunda alnyp barylýan işler oňyn netijelerini berýär. Mekdeplerde geçirilýän döredijilik bäsleşikleri, çeper okaýyş dabaralary, edebi duşuşyklar ýaşlaryň zehinini açmaga giň ýol açýar.
Gahryman Arkadagymyzyň hem-de Arkadagly Gahryman Serdarymyzyň taýsyz tagallalary netijesinde milli medeniýetimize, dilimize we edebiýatymyza goýulýan belent sarpa biz mugallymlary täze üstünliklere ruhlandyrýar. Şeýle uly ynama mynasyp bolmak üçin ýaş nesle diňe bir bilim bermek bilen çäklenmän, olary giň dünýägaraýyşly, ruhubelent, Watana wepaly şahsyýetler edip terbiýelemek ugrunda yhlasly zähmet çekýäris.
Biz, türkmen dili we edebiýaty mugallymlary, mukaddes ene dilimiziň mertebesini has-da beýgeltmek, milli edebi mirasymyzy ýaşlaryň kalbyna siňdirmek, Watanymyzyň geljegi bolan ýaş nesli kämil adamlar edip ýetişdirmek ugrunda mundan beýläk-de yhlas bilen zähmet çekeris. Edebi mirasa goýulýan hormat halkymyzyň ruhy güýjüni has-da artdyrýar.
Gülsenem RUSTEMOWA,
Farap etrabynyň 14-nji orta mekdebiniň mugallymy.
