Düzzüm boýunça Lebap welaýatynyň birinjiligi geçirildi

Türkmenabat şäherindäki 9-njy orta mekdepde düzzüm boýunça 14 ýaşa çenli oglan-gyzlaryň arasynda Lebap welaýatynyň birinjiligini almak ugrunda ýaryş geçirildi. Oňa welaýatymyzyň orta mekdeplerinde bilim alýan ýaşlaryň 30-dan gowragy gatnaşdy.
Çekeleşikli häsiýete eýe bolan oýunlar türgenleriň ýaryşa taýýarlykly gelendiklerini görkezdi. Oglanlaryň arasynda şahsy görnüşde geçirilen ýaryşlarda Türkmenabat şäherindäki 13-nji sport mekdebiň türgenleri aýratyn tapawutlanmagy başardylar. Olardan Amir Öwezow, Sanjar Awezow we Alişan Astanow degişlilikde birinji, ikinji we üçünji baýrakly orunlary eýelediler.
Gyzlaryň arasynda geçirilen ýaryşda bolsa türkmenabatly Selbi Matşaripowa birinji, Aýnura Bazarbaýewa ikinji orunlara mynasyp boldular. Ýaryşyň üçünji ornuny bolsa Saýat etrabyndaky 29-njy orta mekdebiň okuwçysy Suraý Arslanowa eýeledi.