Düzzüm boýunça Lebabyň birinjiligi geçirildi

Türkmenabat şäherindäki 13-nji sport mekdebinde düzzüm boýunça welaýatyň birinjiligi geçirildi. 2007-nji ýylda doglan oglan-gyzlaryň arasynda geçirilen ýaryşlara Türkmenabat şäherinden, Saýat we Dänew etraplaryndan türgenleriň 30-a golaýy gatnaşdy.
Şahsy görnüşde oglanlaryň arasynda guralan ýaryşlarda ussat tälimçi Kamiljan Jumaniýazowyň türgenleri Amir Öwezow, Gaýrat Bahtiýarow we Sanjar Awezow baýrakly orunlary eýelediler. Gyzlaryň arasyndaky şeýle ýaryşlarda dänewli Mehri Aýmakowa iň köp utugy toplap, birinjiligi gazandy. Türkmenabatly Niginabanu Çaryýewa we Dilnaza Jumaniýazowa degişlilikde ikinji we üçünji baýrakly orunlary eýelediler.