TÜRKMENISTAN HABARLARY

Dünýäniň iň kiçi döwletinde Türkmenistanyň ilçisi işläp başlady

Keramatly Pýotryň Ybadathanasynda Türkmenistanyň Watikandaky täze
bellenen Ilçisi Wepa Hajiýewiň ynanç hatlaryny gowşuryş dabarasy geçirildi. Bu barada Türkmenistanyň DIM-niň web-saýtynda habar berilýär.
Dabara Papa Fransiskiň ýüzlenmesinden başlanyp, onda ählumumy wehimleri ýeňip geçmekde diplomatiýanyň möhüm ähmiýeti nygtaldy.
Rim Papasy Watikanyň «oňyn bitaraplyk» ýörelgesine ygrarlylygyny aýratyn belledi hem-de meseleleri çözmekde umydy we döredijilikli çemeleşmäni elden bermezlige çagyrdy.
Rim Papasy bilen gysga söhbetdeşligiň dowamynda Wepa Hajiýew türkmen halkynyň Milli Lideri, Türkmenistanyň Halk Maslahatynyň Başlygy
Gurbanguly Berdimuhamedowyň we Türkmenistanyň Prezidenti Serdar
Berdimuhamedowyň ýollan salamyny we iň gowy arzuwlaryny ýetirdi. Iki
ýurduň bitaraplyk ýörelgesi esasynda daşary syýasaty durmuşa geçirmekdäki çemeleşmeleriniň meňzeşligi bellenildi.
Mähirli sözler üçin minnetdarlyk bildirip, Papa Fransisk öz gezeginde türkmen halkynyň Milli Lideri, Türkmenistanyň Halk Maslahatynyň Başlygyna, Türkmenistanyň Prezidentine we türkmen halkynyň adyna iň gowy arzuwlaryny ýollady.
Şol gün Türkmenistanyň Ilçisi bilen Watikanyň Döwlet sekretary, kardinal
Pýetro Paroliniň arasynda hem duşuşyk geçirildi. Gepleşikleriň dowamynda syýasy we medeni-ynsanperwer ugurlardaky hyzmatdaşlygyň geljegi ara alnyp maslahatlaşyldy.