Daşoguzda täze şäherçe açyldy

Daşoguz welaýatynyň Köneürgenç etrabynyň Täze ýol geňeşliginde döwrebap Bitaraplyk şäherçesi hem-de täze awtomobil köprüsiniň açylmagy mynasybetli dabaralar geçirildi.
Bitaraplyk şäherçesinde 400 ýaşaýyş jaýy, geňeşligiň edara binasy, hyzmatlar öýi, aragatnaşyk bölümi, 420 orunlyk orta mekdep, 160 orunlyk çagalar bagy, 200 orunlyk medeniýet öýi, saglyk öýi, 500 orunlyk toý mekany we önümçilik maksatly desgalaryň gurulandygy habar berildi. Şäherçede ýol-ulag, aragatnaşyk, suw, elektrik, gaz we lagym ulgamlary, giň yşyklandyryşly
awtomobil ýollary we gök zolaklar döredildi. Täze oba hem-de şäherçeler ilatyň ýaşaýyş-durmuş şertlerini gowulandyrmaga, täze iş orunlaryny döretmäge we ýerli ilatly nokatlaryň ösdürilmegine mümkinçilik berýär.