Darganatada iň gowy mekdep muzeýi kesgitlenildi
Kärdeşler arkalaşyklarynyň Darganata etrap birleşmesi Türkmenistanyň Ylym we bilim işgärleriniň kärdeşler arkalaşyklarynyň etrapdaky ilkinji guramalarynyň başlyklarynyň geňeşi we etrap bilim bölümi bilen bilelikde orta mekdeplerde hereket edýän muzeýleriň arasynda «Iň gowy mekdep muzeýi» atly bäsleşigi geçirdi.
Bäsleşigiň şertlerine laýyklykda eminler topary tarapyndan muzeý gymmatlyklarynyň, geçmişimize degişli taryhy maglumatlary beýan edýän eserleriň saklanylyşy öwrenildi we olara baha berildi. Şonuň netijesinde 14-nji orta mekdebiň muzeýi «Iň gowy mekdep muzeýi» diýlip yglan edildi. Bu muzeýiň işiniň ýokary baha mynasyp bolmagynda mekdebiň taryh mugallymy Amansoltan Kazakowanyň hyzmaty uludyr. Bäsleşikde ikinji we üçünji orunlara degişlilikde 2-nji we 12-nji orta mekdepleriň muzeýleri mynasyp boldy. Emin agzalary bu mekdepleriň taryh mugallymlary Atajan Huddyýewiň we Agamurat Agamuradowyň muzeýleriň işlerine göreldeli ýolbaşçylyk edýändiklerini bellediler.
Bäsleşigiň ýeňijilerine ony guraýjylar tarapyndan Hormat hatlary we gymmat bahaly sowgatlar gowşuryldy.
