Dänewli küştçi uýalar Şri-Lankada geçirilen ýaryşda goşa medala eýe boldular

Dänew etrabyndaky 31-nji orta mekdebiň 12-nji synp okuwçysy Leýla Şöhradowa ýakynda Şri-Lankanyň Kolombo şäherinde 20 ýaşa çenli küştçüleriň arasynda geçirilen Günbatar Aziýanyň çempionatynda altyn medala mynasyp boldy.
9 döwletden 110 küştçini özünde jemlän halkara ýaryşda dänewli küştçi gyz 6,5 utuk bilen küştüň rapid görnüşi boýunça hormat münberiniň birinji basgançagyna çykdy. Ol ikinji orny eýelän bäsdeşi ― hindistanly türgen Şri RediKirtiden ýarym, üçünji orny eýelän Şri-Lankanyň wekili Daamadi Sanuduladan 1 utuk öňe saýlandy.
Şu ýaryşda Leýlanyň dogany, Halkara nebit we gaz uniwersitetiniň talyby Lala Şöhradowanyň hem kümüş medala mynasyp bolandygyny nygtamak gerek. Bu ýeňiş bilen ol halkara derejeli ussatlygyň talap edilýän ilkinji utuklaryny gazandy.