Çehiýada dört altyn medal bilen
Çehiýanyň Pardubise şäherinde geçirilýän şotokan karate boýunça 12-nji dünýä çempionatynda Türkmenistanly ýaş karateçi altyn medallaryň dördüsini gazandy. Gökdepe etrabyndaky daşary ýurt dillerine ýöriteleşdirilen 1-nji orta mekdebiň 5-nji synp okuwçysy Öwezmyrat Sapadurdyýew bu üstünlige 10-11 ýaşly oglanjyklaryň arasynda eýe boldy.
31 döwletden türgenleriň 733-sini ýygnan dünýä çempionatynda karateniň kata we kumite görnüşleri boýunça dürli agram derejelerinde medallaryň 246 toplumy ugrunda göreş alnyp baryldy. Türkmenistanly türgen altyn medallary şobu ippon kumite (tutluşyk türgenleriň biri 2 utuk gazanýança dowam edýär), şobu sanbon kumite (tutluşyk 6 utuga çenli dowam edýär), WKF kumite (tutluşyk 8 utuga çenli dowam edýär) we şobu ippon kumiteniň aňrybaş agram derejesindäki tutluşygynda (tutluşyk 2 utuga çenli dowam edýär) gazandy.