Çärjewli mekdep okuwçysy TÜRKSOÝ-yň döredijilik bäsleşiginde ikinji orny eýeledi

Çärjew etrabyndaky 41-nji orta mekdebiň 11-nji synp okuwçysy Aýsel Semenderowa Türki medeniýetiň halkara guramasy (TÜRKSOÝ) tarapyndan yglan edilen çagalaryň halkara döredijilik festiwalynda 2-nji orna mynasyp boldy. Ol bu üstünligini festiwalyň «Türki dünýäsiniň milli oýunlary» atly surat çekmek boýunça bäsleşiginde gazandy. Bu tapgyrda gatnaşyjylar öz ýurduna
mahsus milli oýunlary şekillendirdiler.
Çärjewli mekdep okuwçysyndan başga-da, bäsleşigiň bu ugry boýunça Wekilbazar etrabyndaky 7-nji orta mekdebiň 10-njy synp okuwçysy Bibinabat Aşyrowa 1-nji orna, Gökdepe etrabyndaky 12-nji orta mekdebiň 11-nji synp okuwçysy Wepa Geldimämmedow 3-nji orna mynasyp boldular.
Türkmenistanly çagalar festiwalyň çäklerinde ýekelikde aýdym aýtmak, saz çalmak, toparlaýyn tans etmek, surat çekmek boýunça geçirilen bäsleşiklerde baýrakly orunlara hem-de Hormat hatlardyr gymmat bahaly sowgatlara mynasyp boldular. Ýurdumyzdan wekilçilik eden ýaşlarymyz festiwalyň
çäklerinde Aktau şäheriniň gözel ýerlerine syýahat etdiler.