Çärjewde körpeleriň dil bäsleşigi geçirildi
Çärjew etrabyndaky 24-nji çagalar bakja-bagynda «Diller ― dostluk köprüsi» atly bäsleşik geçirildi. Etrap bilim bölüminiň guramagyndaky bu bäsleşige etrapdaky çagalar baglarynyň ähliisnden zehinlije körpeler gatnaşdylar.
Daşary ýurt dillerini çuň öwrenmäge höwes döretmek, çagalaryň sözleýiş dilini ösdürmek hem-de olaryň ukyp-başarnyklaryny ýüze çykarmak maksady bilen geçirilen bäsleşige uly (mekdebe taýýarlaýyş) toparlaryň zehinli körpeleri gatnaşdy.
Bäsleşigiň şertlerine görä körpeler, ilki bilen, daşary ýurt dillerinde özleri bilen tanyşdyrdylar. Soňra olar daşary ýurt dillerinde labyzly goşgy okamakdan başlap, aýdymlary we sahna oýunlaryny ýerine ýetirmäge çenli ukyplaryny görkezdiler. Çykyşlara baýry bilim işgärlerinden ybarat eminler baha berdiler.
Netijede, bäsleşigi kabul eden çagalar bakja-bagynyň körpesi Leýli Bahramowa ähli bäsdeşlerinden öňe saýlanyp, birinji orna mynasyp boldy. Etrabymyzdaky 2-nji çagalar bakja-bagynyň körpesi Islam Atahanow, 23-nji çagalar bakja-bagyndan Yhlas Jumaýew hem-de 28-nji çagalar bakja-bagyna wekilçilik eden Gülnäz Ýagmurowa ikinji orna mynasyp boldy. Öňdebaryjylaryň üçlügini 26-njy çagalar bakja-bagynyň körpesi Oraz Aýdogdyýew bilen 16-njy çagalar bakja-bagyndan Nurana Furkadowa jemledi.
Ýeňijilere guramaçylar tarapyndan gymmatbahaly ýadygärlik sowgatlary
gowşuryldy.
