Çärjewde ekologiýa meseleleri boýunça maslahat geçirildi

Çärjew etrabyndaky 41-nji orta mekdepde BMG-niň Çagalar gaznasynyň (UNICEF) Türkmenistandaky wekilhanasynyň guramagynda okuw maslahaty geçirildi. Oňa Türkmenistanyň Bilim ministrliginiň, Türkmenistanyň Milli Bilim institutynyň wekilleri, welaýatymyzyň mekdebe çenli çagalar edaralarynyň işgärleri gatnaşdylar.
«Mekdebe çenli bilim edaralary üçin howanyň üýtgemegine uýgunlaşmak boýunça okuw maksatnamasy we usuly gollanmasy» boýunça geçirilen bu okuw maslahatynda ýurdumyzyň mekdebe çenli çagalar edaralarynda bilim we terbiýe bermek işiniň dünýä ülňülerine laýyklykda guralyşy dogrusynda täsirli çykyşlar diňlenildi. Şeýle-de çagalarda ekologiýa medeniýetini kemala getirmegiň, daşky gurşawa söýgi döretmegiň, körpelere ösümlikleri ekmegi we baglara ideg etmegi öwretmegiň usullary ara alnyp maslahatlaşyldy. Çykyşlarda ösüp gelýän ýaş nesli milli ruhda terbiýelemekde, tebigy gymmatlyklarymyzy gorap saklamakda, ata-babalarymyzdan miras galan gadymy däplerimiziň üstünlikli dowam etdirilmegini gazanmakda Gahryman Arkadagymyzyň we hormatly Prezidentimiziň kitaplaryndan peýdalanmagyň ähmiýeti dogrusynda aýdyldy.