Bütindünýä saglyk güni mynasybetli ýaryşlar geçirildi
Lebap welaýat sport we ýaşlar syýasaty baş müdirliginiň guramagynda Türkmenabat şäherindäki 5-nji, 6-njy sport mekdeplerinde Bütindünýä saglyk güni mynasybetli sportuň dürli görnüşleri boýunça sport çäreleri geçirildi. Bu barada «Türkmen gündogary» gazeti ýazýar.
Stoluň üstünde oýnalýan tennis boýunça ýaryş Türkmenabat şäherindäki 6-njy sport mekdebiniň tälimçisi Adylbek Jumanowyň türgenleriniň gatnaşmaklarynda geçirildi. Ýaşlar sportuň bu görnüşiniň tärlerini ussatlyk bilen ele alandyklaryny subut etdiler. Şeýle-de ýaş sport söýüjileri gimnastika, welosiped sürmek boýunça öz başarnyklaryny görkezdiler. Bütindünýä saglyk güni mynasybetli geçirilýän sport çäreleri welaýatymyzyň edara-kärhanalarynda, sport mekdeplerinde dowam edýär. Olara dürli ýaşdaky we kärdäki ildeşlerimiz uly höwes bilen gatnaşýarlar. Sport çäreleri bilen bir hatarda sagdyn durmuş ýörelgesini wagyz etmek boýunça hem maksadalaýyk işler alnyp barylýar.
