Islendik döwürde-de ylymly-bilimli, edepli, hakyky watançy nesilleri terbiýelemek esasy meseleleriň biri hasaplanýar. Şu esasdan berkarar döwletimizde umumy bilim edaralarynyň işini kämilleşdirmek ugrunda giň gerimli özgertmeler üstünlikli durmuşa geçirilýär. Bu ugurdaky maksatnamalaýyn işler ýurdumyzda kämil bilimli we başarnykly ýaşlaryň kemala gelmegine şert döredýär. Şanly ýylymyzda Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasynyň tassyklanylmagy-da milli bilim ulgamyny döwrebaplaşdyrmagyň ýolundaky möhüm ädimleriň biri boldy. Bu Konsepsiýa we ony amala aşyrmak boýunça ýerine ýetirilmeli çäreleriň meýilnamasy ýaşlara berilýän bilimiň hilini we derejesini halkara ülňülerine laýyk getirmäge, okatmagyň usulyýetini kämilleşdirmäge, şol sanda mugallymlaryň döredijilik başlangyçlaryny ýokarlandyrmaga gönükdirilendir.
Ýurdumyzyň bilim ulgamynda dowam etdirilýän şeýle toplumlaýyn başlangyçlar mekdebe çenli çagalar edaralarynyň işinden başlanýar. Körpe nesiller üçin döwrebap çagalar baglarynyň gurlup ulanylmaga berilmegi ýaş nesliň diňe bir wagtlaryny şadyýan geçirmeklerini üpjün etmän, eýsem, sowadyň we bilimiň ilkinji basgançaklaryndan üstünlikli geçmäge mümkinçilik döredýär. Ýurdumyzda orta bilimiň yzygiderli ösdürilmegi, okatmagyň hiliniň ýokarlandyrylmagy, ulgamyň maddy-enjamlaýyn binýadynyň pugtalandyrylmagy, halkara tejribeleriniň öwrenilmegi we ýurdumyzyň bilim edaralaryna ornaşdyrylmagy Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýany durmuşa geçirmekde öňde durýan esasy wezipeleriň hataryny düzýär. Şeýle hem bu ugurdaky meýilnamalaýyn çäreler ýaşlara daşary ýurt dillerini çuňňur öwretmegi, okuwçylaryň dil başarnygyny kämilleşdirmegi, okatmak işine lingwistika ulgamyndaky innowasion tehnologiýalary girizmegi üpjün edýär.
Ýaşlaryň nurana ertirleri ugrundaky şeýle aladalar olaryň döredijilik mümkinçiliklerini açmaga, ýaş nesli täze gözleglere ruhlandyrmaga, ukyp-başarnykly şahsyýetleriň kemala gelmegine ýol açýar. Ylym-bilim ugrundaky toplumlaýyn çäreler hem geljekde Watanymyzyň şöhratyny dünýä ýaýjak, ýurdumyzyň ösüşine özleriniň mynasyp goşantlaryny goşjak çuňňur bilimli we giň gözýetimli hünärmenleriň kemala gelmegini şertlendirýär.
Reýhan Açylowa,
Çärjew etrabyndaky 25-nji çagalar bagynyň terbiýeçisi.