Bilim adamzat jemgyýetiniň ösüşiniň iň esasy hereketlendiriji güýjüdür. Ol adamyň dünýägaraýşyny giňeldýär, aň-düşünjesini kämilleşdirýär we oňa durmuşda öz ornuny tapmaga kömek edýär. Berkarar döwletiň täze eýýamynyň Galkynyşy döwründe ýaşlaryň döwrebap ylym-bilim almagy döwlet syýasatynyň ileri tutulýan ugurlarynyň birine öwrüldi. Çünki kämil nesil — güýçli döwlet diýmekdir.
Häzirki wagtda tehnologiýalaryň çalt depginler bilen ösmegi bilime bolan talaby has-da artdyrýar. Sanly bilim ulgamynyň ornaşdyrylmagy okatmagyň hilini ýokarlandyrýar we dünýä derejesindäki bilimlere elýeterliligi üpjün edýär. Diňe bir okuw kitaplary bilen çäklenmän, eýsem yzygiderli gözlegde bolmak, täze dilleri öwrenmek we innowasion tehnologiýalary özleşdirmek her bir ýaşyň mukaddes borjudyr.
Bilim almak diňe bir hünär eýesi bolmak däl, eýsem ruhy taýdan baýlaşmakdyr. Ol adama sabyrlylygy, zähmetsöýerligi we jemgyýete peýda getirmegi öwredýär. Ylymly adam garaňkyda ýanýan çyra meňzeşdir; ol hem öz ýoluny yşyklandyrýar, hem-de töweregindäkilere nusga bolýar. Şol sebäpli hem «Okamak — iň uly baýlykdyr» diýen pähim öz ähmiýetini hiç wagt ýitirmeýär.
Netijede, ylymly-bilimli nesiller Türkmenistanyň mundan beýläk-de rowaçlanmagyna we dünýä arenalarynda abraýynyň artmagyna uly goşant goşarlar. Bilim — bu hiç wagt gutarmaýan hazynadyr, ony näçe köp paýlaşsaň, şonça-da köpelýär.
EMINOW Suwhan,
Halkara senagatçylar we telekeçiler uniwersitetiniň Dil öwreniş bölüminiň
103-nji okuw toparynyň talyby.
