Berkarar Döwletiň täze eýýamynyň Galkynyşy döwründe Türkmen Halkynyň milli Lideri Gahryman Arkadagymyzyň Arkadagly Gahryman Serdarymyzyň saýasynda her ýyl ýurdumyzda Watan gerçeklerini hatyralap Beýik Ýeňşiň baýramçylygy uludan baýram edilip bellenilýär. Ynha bu ýyl bolsa ,,Halkara parahatçylyk we ynanyşmak“ ýylymyzda mukaddes Bitaraplygymyzyň şanly 30 ýyllyk toýunuň belleniljek ýylynda Beýik Ýeňşiň gazanylandygyna 80 ýyl dolýar.
Hut şu şanly sene mynasybetli ýurdumyzyň ähli ýerlerinde giň gerimli dabaraly çäreler geçirilýär. Bu gün Beýik Ýeňşiň 80 ýyllygy mynasybetli Türkmenabat şäher Beýik Watançylyk urşy muzeýinde dabara gurnaldy. Oňa il sylagly ýaşulular, kümüş saçly eneler, Türkmenistanyň Demokratik Partiýasynyň welaýat komiteti, etrap, şäher komitetleriniň işjeň agzalary, Lebap welaýat kazyýeti, Lebap welaýat gümrükhanasynyň işgärleri gatnaşdylar.
Dabara gatnaşyjylar muzeýde Beýik Watançylyk urşunda ildeşlerimiziň frontda we tylda görkezen edermenligini, merdanalygyny, halkymyzyň belent ruha, watançylyk duýgusyna ýugrulan gahrymançylygyny beýan edýän gymmatly we köptaraplaýyn muzeý gymmatlyklary jemleýän sergä tomaşa etdiler. Bu ýerde Gahryman Arkadagymyzyň atasy, ussat mugallym Berdimuhammet Annaýew nusgalyk durmuşy barada çykyşlar dabara gatnaşanlarda örän uly täsir galdyrdy. Muzeý ildeşlerimiz tarapyndan sowgat berlen dürli görnüşli gymmat baha şay-sepler türkmen halkynyň Beýik Ýeňişiň gazanylmagyna uly goşant goşandygyna şaýatlyk edýär.
Türkmenistanyň çäginden uzaklarda mukaddes Watan goragynda gahrymançylykly söweşip, wepat bolan türkmen gerçekleriniň atlary ,,Hatyra” kitabynda baky orun alandyr. Şonuň bilen birlikde Beýik Watançylyk urşunda mukaddes ojaklaryna ýeňiş bilen gaýdyp gelen Türkmenistanly esgerleriň atlary ,,Şöhrat” kitabyna girizildi. Olaryň uruşda we tylda görkezen edermenligi, geçen gahrymançylykly we şöhratly ýoly asyrlar boýy ýaşar.
Oňa ,,Beýik Watançylyk urşy” muzeýinde jemlenen muzeý gymmatlyklary aýdyň şaýatlyk edýär. Aýratyn buýsanç bilen bellemeli zatlaryň biri, 2025-nji ýyl ,,Halkara parahatçylyk we ynanyşmak“ ýylynda bellenilýän Beýik Ýeňşiň 80 ýyllygy mynasybetli Russiýa Federasiýasynyň Beýik Watançylyk urşy muzeýine 2 sany medalyň ýadygärlik sowgat berilmegi ildeşlerimizi bu baýramçylyk gününde begendirdi we buýsandyrdy. Sowgat iberlen medallar muzeý gymmatlyklarymyzyň gaznasyny has-da baýlaşdyrdy.
