Bahar gunçalary
Ýaňy ýakynda welaýatymyzyň merkezi bolan Türkmenabat şäheriniň 2-nji çagalar sungat mekdebinde Milli bahar baýramyna bagyşlanan ýaş zehinleriň konserti geçirildi. Konsertde mekdebiň ″Kirişli saz gurallar″ bölüminiň mugallymy Ÿulduz Nazarowanyň kiçi synp okuwçylary çykyş edip, özüniň zehinini,hyjuwyny görkezip, saza bolan çäksiz söýgüsini diňleýjilere ýetirmegi başardylar.
Konsertiň meýilnamasynda türkmen we daşary ýurt nusgawy kompozitorlarynyň eserleri ýaňlandy. Mugallym özüniň okuwçylarynyň başarnygyna we mümkinçiliklerine görä eserleri saýlamagy başarmakdan daşary hem okuwçylaryň sahnada özüni alyp barmak medeniýetine hem üns berýändigi çagalaryň çykyşlaryndan aýdyň duýulýar.
Konsert skripka hünäriniň birinji synp okuwçysy Nurmyradowa Çynaryň N.Muhadowyň ″Horazjyk″ atly eseri bilen başlandy. Çynarjan bu eseri uly höwes bilen ýerine ýetirip, diňleýjileriň gyzgyn el çarpyşmalaryny gazandy.
Soňra 1-nji synp okuwçysy Nuriddinowa Leýli Ç.Babaýewiň ″Kiçijik wals″ atly eserini özüniň ýaşlygyna seretmezden häsiýetine doly girişip, ýerine ýetirdi. Ýene-de 1-nji synp okuwçysy bolan Bekiýewa Aýgüliň awstriýaly beýik kompozitory W.Mosartyň ″Allegretto″ eserini ýeňil we ýagty äheňde, sazlaşykly çalmagy başardy.
4-nji synp okuwçysy Ajap Rozyýewanyň bolsa rus nusgawy kompozitory P.Çaýkowskiniň ″Neapolitan aýdymy″ atly ajaýyp eseri ýerine ýetirmek paýyna düşüp, ony Ajap uly höwes bilen ýerine ýetirip, eseriň dowamynda ähli ştrihleri arassa we heňi akgynly , üzünüksiz alyp gitmegiň hötdesinden geldi.
1-nji synp okuwçysy Sewinç Nowruzowanyň ýerine ýetirmeginde bolsa W.Rebikowyň ″Serçejik″ atly oýun häsiýetli eseri gaty owadan we ýerlikli ýaňlandy. Ähli okuwçylaryň üstünlikli çykyşyna elbetde gaty duýgurlyk bilen sazandarlyk eden mugallym J.Orazowanyň zähmetini bellemek hökmanydyr. Kiçijik sazandalara konsertmeýsterlik etmek gaty uly jogapkärçiligi, sabyrlylygy, hünär mugallymyndan bolsa okuwça bolan ynamy we öz hünärine wepalylygy talap edýär.
Şeýle üstünlikli geçen bu baýramçylyk konserti hem mugallymlar bilen okuwçylarynyň saza we öz saýlap alan hünärine bolan uly söýgüsiniň aýdyň subutnamasydyr.
Türkmenabat śäherindäki 2-nji çagalar sungat mekdebiniñ mugallymy Ÿulduz Nazarowa
