Awazada elýeterli gämili gezelenç hyzmaty ýola goýuldy
Eger siz «Jeyhun.news»-iň şu habaryny deňiz kenarynda, dynç alyşda okaýan bolsaňyz, bir hoş habary paýlaşmak isleýäris. Türkmenistanyň Deňiz söwda floty ýörite Awazada dynç alýanlar üçin gämili gezelenjiň ýola goýlandygyny habar berdi.
Flotyň bu hyzmatyndan peýdalanyp, bary-ýogy 45 manatlyk töleg bilen 3 sagadyň dowamynda ajaýyp Awazany deňziň giňişliklerinden synlap bilersiňiz. Gämi kenar ýakasynda 3 sagadyň dowamynda aýlanýar.
Mundan başga-da gämiler, Türkmenbaşy — Gyzylsuw — Türkmenbaşy ugry boýunça yzygiderli deňiz gatnawyny amala aşyrylýar. Gyzylsuw — bu Türkmenistanyň Hazar deňizindäki ilatly ýeketäk adasysydyr. Bu ugur boýunça gämili gatnawyň bahasy bir tarapa 20 manat.
