Alpan obasyndaky mekdep täze okuw ýylynda işe giriziler
Saýat etrabynyň Merýe geňeşliginiň Alpan obasynda gurulýan orta mekdebiň gurluşygy tamamlaýjy tapgyryna gadam goýdy.
Oba görk berip duran iki gatly, 400 orunlyk täze mekdebiň daş-töweregini abadanlaşdyrmak, bag daragtlaryny oturtmak işlerine-de girişildi. Gurluşygy «Ussat Tirkiş» hususy kärhanasynyň gurluşykçylary ýerine ýetirýärler.
Täze mekdebiň gurluşygynda gurluşykçylaryň 250-den gowragy yhlas bilen zähmet çekdi. Mekdebiň tutýan meýdany 3,5 gektara barabar. Mekdebiň binasynda mejlisler zaly, synp otaglarynyň 22-si, okuw-tejribe otaglarynyň 3-si, okuw-zähmet synp otagy, mekdebiň ýolbaşçylygy we mugallymlar üçin iş otaglarynyň 6-sy, kitaphana, arhiw, beýleki zeruryýetçilik üçin binalar, 132 orunlyk naharhana, ýapyk sport zaly ýerleşýär. Mekdebe ýanaşyk futbol, woleýbol, basketbol oýnamak üçin niýetlenilen açyk sport meýdançasy hem eýýäm taýýar bolupdyr. Mekdebi elektrik togy bilen üpjün etmek, ýangyn söndürmek üçin desgalar, şeýle hem ýyladyş ulgamy gurlupdyr.
