Akjagül Suhanowa bir sahnada 47-nji möwsümini garşylady

Türkmenistanyň halk artisti, Lebabyň Seýitnazar Seýdi adyndaky döwlet sazly-drama teatrynyň sahna ussady Akjagül Suhanowa 1-nji sentýabrda bu sungat ojagyndaky 47-nji teatr möwsümini garşylady. Bu barada ol şol gün täze möwsümiň açylyş dabarasynda «Jeyhun.news»-iň habarçysy bilen eden
gürrüňdeşliginde aýtdy.
― Ýokary okuw mekdebiniň ahyrky ýylynda okap ýörkäk, biziň toparymyzyň tutuşlygyna şol wagtky Çärjew şäherinde açyljak täze teatrda işlejekdigi aýdyldy. Ählimiziň täze sungat ojagynyň düýbüni tutmaga taýýar bolmagymyzy sargadylar ― diýip, ussat talyplyk ýyllaryny ýakym bilen ýatlaýar.
Şeýlelikde, Akjagül Suhanowadan başga-da, Türkmenistanyň halk artistleri Çary Berdiýew, Kadyrberdi Atabaýew ýaly ussatlar ― ozalky topardaşlar geçen asyryň ýetmişinji ýyllarynyň ahyrynda häzirki Türkmenabat şäherindäki welaýat teatrynyň düýbüni tutýarlar. Bu ýerde sahnalaşdyrylan ilkinji eser hem serkerde şahyr Seýitnazar Seýdä bagyşlanýar. Soňra şahyryň ady teatra berildi.