Türkmenistanyň Agrar partiýasynyň Farap etrap komiteti tarapyndan öňde duran gowaça ekişine guramaçylykly taýýarlyk görmek bilen bagly maslahat geçirildi. Maslahata etrapdaky oba hojalyk kärhanalarynyň ýolbaşçylary, kärendeçiler, mehanizatorlar hem-de ugurdaş düzümleriň wekilleri gatnaşdylar. Onda hormatly Prezidentimiziň oba hojalyk pudagyny döwrebap ösdürmek, ýokary hasyllylygy üpjün etmek baradaky tabşyryklaryndan ugur alnyp, ýazky ekiş möwsümine taýýarlygyň ýagdaýy giňişleýin ara alnyp maslahatlaşyldy.
Maslahatyň dowamynda gowaça ekiljek meýdanlaryň agrotehniki talaplara laýyk taýýarlanylyşy, ýokary hilli tohum bilen üpjünçilik, oba hojalyk tehnikalarynyň abatlygy hem-de ýangyç-çalgy serişdeleri bilen bökdençsiz üpjünçilik meselelerine aýratyn üns berildi. Şeýle hem suwaryş we zeýkeş ulgamlarynyň ýagdaýyny gözden geçirmek, ýerleriň melioratiw ýagdaýyny gowulandyrmak boýunça alnyp barylýan işler barada çykyşlar edildi. Çykyş edenler ýokary hasyl almak üçin agrotehniki çäreleriň öz wagtynda we talabalaýyk ýerine ýetirilmeginiň möhümdigini nygtadylar.
Maslahatyň ahyrynda öňde duran möhüm wezipeleri üstünlikli ýerine ýetirmek, gowaça ekişini ýokary guramaçylyk derejesinde geçirmek hem-de ýurdumyzyň pagta öndürijiligine mynasyp goşant goşmak boýunça degişli tabşyryklar kesgitlenildi. Şeýle duşuşyklar oba hojalyk işgärleriniň sazlaşykly we netijeli zähmet çekmegine, Farap etrabynda hem bol hasylyň düýbüni tutmaga berk esas döredýär.
