Berkarar döwletiň täze eýýamynyň Galkynyşy döwründe ýurdumyzyň her bir güni toýdur baýramlara, şanly senelere beslenýär. Şeýle ajaýyp baýramçylyklaryň biri 8-nji mart Halkara zenanlar günidir. Zenan-öý ojaklarymyzyň bezegi, durmuşymyzyň gözelligidir. Zenan diýmek- bu goja bir dünýädir. 8-nji mart Halkara zenanlar güni mynasybetli “Jeýhun” toý mekanynda Türkmenabat şäheriniň 2-nji çagalar sungat mekdebiniň gelin-gyzlarymyzyň, ene-mamalarymyzyň hormatyna taýýarlan konserti geçirildi.
Konsert maksatnamasy mekdebimiziň aýdymçylar toparynyň “Aýdym aýdýarys”, “Eneler” diýen ajaýyp çykyşlary bilen başlandy, onda ýaşajyk uçgunjyklar eziz enelerimiziň, gelin-gyzlarymyzyň mähremligini, wepalylygyny owadan aýdym-sazlar bilen beýan etdiler. Ýaňlanan aýdym eserlerine “Horuň dirižýorlugy” bölüminiň mugallymy Rozyýewa Maýsa ýolbaşçylyk etdi.
Şowhunly çykyş bilen başlanan baýramçylyk konserti mekdebiň 3-nji synp okuwçysy Aýbek Çaryýewiň ýerine ýetirmeginde “Gülýalak” aýdymy bilen dowam etdi. Soňra dabara mekdebiň “Ýalkym” saz toparynyň çykyş etmeginde (fleýta we akkordeon) “Güller çemeni” atly eseriň üsti bilen bahar paslynyň al-elwan bägüllerine deňelýän hüýr melek gelin-gyzlarymyzyň kalbynyň senasy bolup ýaňlandy.
Birnäçe konsertleriň bezegi bolan “Batly gadam” uly skripkaçylar toparynyň “Güneşli ülkäm” sazyny, kiçi skripkaçylar toparynyň ýerine ýetirmeginde bolsa fransuz kompozitory Ž.Offenbahyň “Can can” sazynyň ajaýyp şowhunly çykyşlary konsert dabarasyna aýratyn öwüşgin, bezeg çaýdy. Mekdebiň “Güneş” uly hor
toparynyň ýerine ýetirmeginde Rejep Rejepowyň “Bahar geldi” atly akapellasy pasyllaryň soltany bolan bahar paslynyň buşlukçysy hökmünde ýaňlanyp, konserdiň tolgundyryjy, şowhunly pursatlaryna öwrüldi. Bu hor toparynyň ýolbaşçysy “Horuň dirižýorlugy” bölüminiň mugallymy Maýagözel Nazarowa.
Şeýle hem mekdebiň ýaş zehinli sazandalary Meýmanowa Leýliniň we Rozumbaýewa Jasminiň fortepiano we kanon üçin duet eseri diýseň täsirli boldy.
Soňra mekdebiň “Fortepiano bölüminiň” ýerine ýetirmeginde türkmen halkynyň baý medeni mirasyndan, milli däp-dessurlaryndan habar berýän türkmen halk döredijiliginden düzülen folklor toparynyň çykyşlary uly ähmiýete eýe boldy.
Soňra “Üflenip we kakylyp” çalynýan saz gurallar bölüminiň “Mukam” depçiler toparynyň ýerine ýetirmeginde “Gündogar halklary” atly sazynda depiň ýaňlanan sesleri diňleýjileriň ünsüni çekdi. Dutarçylar ansambl toparynyň “Näzlim” türkmen halk sazynyň milliligiň baý öwüşginlerinden dörän sazyny diýseň ussatlyk bilen ýerine ýetirdiler. Bu baýramçylyk konsertinde gelin-gyzlarymyzyň päkligini,
gözelligini sadalygyny, ene-mamalarymyzyň gyzgyn söýgüsini joşgunly aýdym-sazlar, folklor toparlaryň çykyşlary bilen beýan edildi. Soňra “Saz nazaryýeti” bölüminiň okuwçylarynyň ýerine ýetirmeginde sazy Jemal Reýimowanyň, sözleri A.Soltanowanyň “Enemjan” aýdymy ýaňlanyp, kümüş saçly enelerimiziň
söýgüsini wasp etdiler. Dabara mekdebiň bagşy we dutarçylar ansambl toparynyň bagşyçylyk sungatynyň kämilleşmegi ugrunda zähmet çekýän Gurbandurdy Öwezowyň döreden “Mukam” atly uly buýsanja beslenen aýdymy Halkara zenanlar gününe bagyşlanan döredijilik konserdini jemledi.
Ahlak gözelliginiň belent nusgasy bolan mährem zenanlaryň, gelin-gyzlarymyzyň, ene-mamalarymyzyň sarpasy, mertebesi elmydama belent tutulýar. Türkmen zenanlarynyň waspy şahyrlaryň şygyrlarynyň, bagşylaryň mahmal owazlarynyň, suratkeşleriň, heýkeltaraşlaryň döredýän eserleriniň iň görnüklisi
bolup, ähli adamzadyň diliniň senasy hökmünde belentden ýaňlanýar. Mährem zenanlarymyzyň Watanymyza wepaly ýaş nesilleri terbiýeläp ýetişdirendikleri üçin “Zenan kalby” ordeni bilen sylaglanylmagy, köp çagaly enelere “Ene mähri” diýen hormatly adynyň dakylmagy, Halkara zenanlar güni mynasybetli pul sowgatlarynyň gowşurylmagy zenanlarymyza goýulýan hormatdan nyşandyr.
Mährem eneleriň, zenanlaryň mertebesini belentden tutýan, gelin-gyzlarymyzyň öz saýlap seçen hünäriniň eýesi bolmagy, okamagy, döretmegi ugrunda giň mümkinçilikleri döredip berýän Gahryman Arkadagymyza, Arkadagly Serdarymyza ýurdumyzyň ähli zenanlarynyň kalby buýsançly alkyşlardan
doludyr. Şeýle ajaýyp owadan durmuşy halkyna peşgeş beren türkmen halkynyň Milli Lideri Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak bolsun.
Firuza RAIMOWA,
Türkmenabat şäheriniň 2-nji çagalar
sungat mekdebiniň “Umumy
fortepiano” bölüminiň mugallymy
