79-njy «Darganata» saýlaw okrugy boýunça Mejlisiň deputatlygyna dalaşgärler hödürlenildi

Türkmenistanyň Mejlisiniň deputatlarynyň saýlawlaryna taýýarlyk görmegiň çäklerinde, dalaşgärleri hödürlemek işleri demokratik ýörelgelere laýyklykda dowam edýär. Şunuň bilen baglylykda, 79-njy «Darganata» saýlaw okrugy boýunça ýokary döwlet wekilçilikli we kanunçykaryjy edarasynyň agzalygyna üç sany dalaşgär hödürlendi.
Saýlaw okrugy boýunça ilkinji bolup, raýatlar topary tarapyndan Böriýew Yhlas Hallyýewiç hödürlenildi. 1993-nji ýylda Lebap welaýatynyň Döwletli etrabynda doglan Y. Böriýew, häzirki wagtda Türkmenabat şäherinde ýaşaýar. Ol bilimi we tejribesi bilen tapawutlanyp, Türkmenabat şäherindäki daşary ýurt diline ýöriteleşdirilen 30-njy orta mekdebiň müdiriniň terbiýeçilik işleri boýunça orunbasary wezipesinde zähmet çekýär.
Şeýle-de, Türkmenistanyň Demokratik partiýasy tarapyndan bu okrug boýunça Mamedowa Aýbölek Begmuradownanyň dalaşgärligi öňe sürüldi. 1990-njy ýylda Lebap welaýatynyň Garabekewül etrabynda doglan A. Mamedowa, häzirki wagtda Türkmenabat şäheriniň ýaşaýjysydyr. Ol saglygy saklaýyş ulgamynda netijeli işläp, Lebap welaýatynyň Türkmenabat şäher arassaçylyk we keselleriň ýaýramagyna garşy göreşmek gullugynyň zähmet gigiýenasy bölümçesiniň müdiri wezipesini ýerine ýetirýär.
Syýasy partiýalaryň işjeňliginiň netijesinde, Türkmenistanyň Agrar partiýasy tarapyndan Öwezow Rahmanberdi Akmetowiç dalaşgärlige hödürlenildi. 1973-nji ýylda Lebap welaýatynyň Kerki etrabynda doglan R. Öwezow, öz dogduk etrabynyň ýaşaýjysydyr. Ol häzirki wagtda Türkmenistanyň Agrar partiýasynyň Lebap welaýatynyň Kerki etrap komitetiniň başlygy wezipesinde işläp, sebitiň durmuş-ykdysady ösüşine öz goşandyny goşýar.
Hödürlenen dalaşgärleriň ählisi jemgyýetçilik durmuşynda işjeňligi we hünär ussatlygy bilen tanalýan şahsyýetler bolup, olar öňde duran saýlawlarda bäsleşikli esasda halkyň wekili bolmak ugrunda bäsleşerler.